ياليل خ ــير

موضوع: ياليل خ ــير الخميس فبراير 11, 2010 9:27 am

ياليل
خير..وما ذكرتك يوم جيت إلا بخير
ما ينخدم بخيل..لكنّك بخيل وتنخدم

لا هيّن إلا
الهيّنه..ولا عسير إلا العسير
ولا
ذميم إلا البخل..ولا حميد إلا الكرم

واللي تعدّى مرحلة الإبداع
والنجم الخطير
صبّها صبّ الذهب وإلا رسمها لك رسم

وش فلسفة سقراط وإلا
وش كتابة شكسبير
إليا تلاقت حنكة
الشايب وطيش المنبطم

استوئمتها وسميت بسم الله وقلت إلا يصير
سوّت سواة المتنبي وأسمعت من به صمم

لأني على الدرب الطويل
أجرّي الدرب القصير
وأمرّ شمطان اللحى
لأهل الشنبات العصم

الصف الأول ما هو بصفّي ولا الصف الأخير
أنا أنا من حيث ما أجلس..هنا يبدى الرقم

شاعر إليا حرّك هجوسي
رياح الغربي عصير
سمّعتك أحلى ما كتبت
من القصيد المنتظم

وإنا صاحت بيوت القصيدة صيحة الحر الأسير
أجيك كنّي قايد الحملة بجيش المعتصم

وإليا بغيت أنافس
الشعّار وأولهم جرير
قلت البيان يصير منّه
سحر والشعرُ حكم

يا شعب كشمير أنت تبغى حق تقرير المصير
وأنا لو إن الأوضاع فيدّيني على ذيّا الخشم

لكني شاعر لا معي ذمّه
ولا عندي ضمير
ما نعرف إلا جرّت
المنكوس في رآس الحزم

لكنّ يا جراح والناقه ماهي مثل البعير
تعال بآعلمك والتدخين ما يبري الألم

البارحه يوم أنصحك
تقولّي يا عم طير
أسلوب خايس بس من حقّك
لكن وين العشم

لو إن ربي هاديٍ بك لو يهودي من نُضير
ترى النبي أكّد على أنها خير من حُمر النعم

وإن كانك مصمم على
التدخين ولا لك مطير
عليك بالمالبورو والله
لا يبارك فالألم

وإليا بغيت نغوص فالمرجان فالبحر الغزير
ولا تهون من القلام الزرق دوّر لي قلم

وإن ما لقيت الدفتر
موضّع على ظهر السرير
إشتر لنا دفتر جديد
أبو ثلاثمية رزم

وأول نصيحة من شوير يسوقها لأغلى شوير
الخال ما آوصيك فيه إليا غلط والعم عم

حسن التعامل يجمل
الرجال في عين النظير
مثل الصبر لممارسين
هواية صعود القمم

وأطيب كلام آحاول أختصره لك بموجز قصير
إن رحت تبغى المطعم وجيت ولقيته مزدحم

مفروض ما تضرب هرن وإن
جالك الهندي يسير
حاول يكون أسلوبك
مهذّب وشكلك محترم

ترى الغنيمة سندويشة جبنه وقوطي عصير
وجهة نظر وأكيد تفهمها وغيرك ما فهم

ترى الحقير اللي بدون
أخلاق..ماني بالحقير
والغالي اللي جنسه شوي
ويكاد أن ينعدم

لكن لا تذكر مطاليق الرجال إلا بخير
الأوّله على شحم والثانيه على شحم

ترى النشاما فالزمن
ذيّا مثل كيس الشعير
إن ما كلته الإبل يا
ستّار تاكله الغنم

وإن همّلوني ربعي عتيبه وخلتني مطير
أشره على العجمان والمُرَّه وأنا بن الآعجم

إتصدّق إني قبل قرنين
مضت كنت الأمير
ما غير أبنّي من عظام
القوم صرحي وآهدم

لكن من جاء فالحكم بانجلترا توني بلير
وأنا يديني تنجرح حتى من أشواك السلَم

غديت طير ناشبه رجليه
في سبق الجرير
الريش حتّ ومابقى إلا
الجلد وحتات العظم

إن قلت بشت الراعي إشجابه لبشت الوزير
قلت الخِياط هو الخِياط الفرق في طول الكمم

لكن على طاري العروبة
وين موسى بن نُصير
إترزّ أعلامه عربنا ما
يرزّ لها علم

لا بارك الله فالقناصل والسفارة والسفير
من ضيق وتضيق الملوك وتبتلش فيه الخدم

وش موزي الحجاج يوم
إنّه يشهّر فالزبير
إلا السنين العوج
والنيات وعيال الزلم

لو أكثر الحكّام يمرض وأكثر العالم يسير
جرّاح تعبير الغلا فالقلب ليسَ في القدم

لو إنّ حنّ نواكب تطور
هالدول ونستنير
صرنا ملوك الأرض
والنيران في رآس العلم

إليا متى والروح تحنى غصب والواقع مرير
ونحن خير أمة قد أخرجت بين الأمم

إن كانها بالكبر
والقوّه بغير الله صغير
ألم ترى فيل أبرهه ولم
ترى ولم ولم

شعوب فينا الذل له ممسى ومقيال وهجير
آرائنا متشتته وأفكارنا ما تنخدم

فينا الغني من البذخ
يتفل على وجه الفقير
وعلى وجيه العافيه
شرهى عيون المنحرم

والأشعريين أولا كانوا وهم جمعٍ غفير
إذ جاع فيهم شخص واحد حفّزوا فيه الهمم

تجمّعوا ثم أجمعوا ما
يملكونه في حصير
تقاسموه بالتساوي كل
بيت له قسم

حتى ذكرهم هادم الأصنام أبو وجهٍ بشير
قال فيما معناه هم منّي وأنا منّهم

لكن نظرة من تفاؤل
تفعل الشي الكثير
ومن باب شدّ وإرخ
للعشّاق من عشقي سهم

لاأنني شاعر أحب ولي طبيعه في خضير
وخضير تاسع جدّ عاشر جدّ مدري المهم

اللي غلاها من ورى
الشريان والضلع القصير
جروحها في القلب يا
جرّاح عيّت تلتئم

ياللي على الطاري قهرك الدرب وأتعبك المسير
توّك تلاهمني وأنا من يوم شفتك ملتهم

دامك خذيت القلب من
بين الحنايا يا خشير
إرحمني الله يرحمك
والله يرحم من رحم

أسير في رمضا وصالك والغنيمه زمهرير
فرقاك لين أصبحت أسطوره تحاك فكل فمّ

يا لافياً من مقلتيّ
دعمّ منقطع النظير
قد احتسم إندماج
وقّعته وقد لا أحتسم

تثيرني وبقدر ما الله تستطيع إنّك تثير
أتقى عروق القلب وأقساها وأكثرها سقم

يا رآس حربه يا ظهير
أيمن يا تدري لا ظهير
إلا فديت عيونك
الثنتين وانته تبتسم

لبيك يا ديباج يا استبرق يا سندس يا حرير
يا لؤلؤ منثور ولؤلؤ في جيد منتظم

في جيدك الإلحاد
والفتنة وفي منحرك غير
اللآت والعزّى وما
تدعي به قريش من صنم

ياكشمير
وش تبغى بتقرير المصير
خلك سواتي والعب المنكوس
في راس الحزم

مما راق لي

اتمنى ان تنال اعجابكم
القصيدة

تحياتي لكم

ودمتم بود